Të drejtat dhe përgjegjësitë e studentëve në Universitetin e Prishtinës rregullohen përmes një kuadri të plotë ligjor dhe institucional, i cili garanton zhvillim akademik, trajtim të barabartë dhe një ambient të sigurt e etik për studime.

Ky kuadër përfshin: rregulloret për studime Bachelor dhe Master si dhe rregullore dhe dokumente tjera relevante ne kuadër te UP-së (linku: https://dokumente.uni-pr.edu/rregullore ) përmes te cilave rregullohen: mënyra e organizimit të studimeve, statusi i studentit, mobiliteti etj. Këtu, gjithashtu  studentët mund të referohen për çdo çështje që lidhet me: regjistrimin dhe çregjistrimin, zhvillimin e semestrave dhe provimeve, përfundimin e studimeve dhe diplomimin.

Me kodin etik (linku: https://dokumente.uni-pr.edu/kodiietikes  ) – rregullohen  marrëdhëniet ndërmjet: studentëve dhe stafit akademik, sjellja e përgjegjshme, ndalimi i diskriminimit dhe ngacmimit, ruajtja e konfidencialitetit.

Studenti ka të drejtë të kërkojë mbrojtje dhe raportim institucional në rast shkeljesh etike.

Organet ku studenti mund të referohet

Çështja	Ku të referohet studenti
Ankesat për vlerësimin akademik	Njësia akademike / Komisioni i ankesave
Çështjet e integritetit (plagjiaturë, sjellje jo etike e stafit)	Këshilli i Etikës i UP-së
Ngacmimi seksual, diskriminimi	Institucionet e Etikës dhe Rregullorja për ngacmim
Çështje të statusit studentor (regjistrim, mobilitet	Shërbimi i studentëve dhe SEMS

 

MBROJTJA E TË DREJTAVE TË STUDENTIT

Studenti ka të drejtë të jetë i informuar për rregullat dhe të kërkojë zbatimin e tyre.
UP garanton një ambient të favorshëm për: mësim, hulumtim, mobilitet, autonomi akademike dhe  respektimin e dinjitetit dhe barazisë.

PËRGJEGJËSITË  E STUDENTËVE

Studenti duhet të ndjekë mësimin me rregull dhe të përmbushë detyrat e kërkuara nga programi studimor.

• Studenti duhet të zbatojë rregulloret e studimeve, përfshirë edhe procedurat si regjistrimi/çregjistrimi.
• Ndalohet çdo formë e plagjiaturës, mashtrimit apo keqpërdorimit të punës së tjetrit.
• Studenti duhet të respektojë mësimdhënësit dhe të shmangë sjelljet diskriminuese, ngacmuese ose shfrytëzuese.
• Studenti duhet të kontribuojë në një ambient të sigurt dhe të shëndetshëm ndaj të gjithëve.
• Të përdor në mënyrë të përgjegjshme pajisjet dhe infrastrukturën e fakultetit, kjo përfshin: pajisjet laboratorike, mjetet teknologjike, bibliotekëndhe platformat digjitale vetëm për qëllime studimi dhe hulumtimi.
• Të ruaj konfidencialitetin kur është e nevojshme.
• Të respektoj raportin profesional dhe privatësinë e të tjerëve.
• Bazuar në parimin e integritetit akademik, studenti pritet të nxisë etikën dhe të raportojë parregullsitë nëse i vëren.