Sot, dekani i FIM, Mirlind Bruçi, së bashku me prodekanët Arlinda Alimehaj Rrecaj dhe Xhevahir Bajrami, pritën në një takim përfaqësuesit e kompanisë Munda Kosova, z. Kushtrim Grainca dhe z. Rilind Bislimin, me ç’rast u unënshrkrua marrëveshje bashkëpunimi në mes të dy institucioneve.

Marrëveshja në përmbajtje përfshin angazhim të përpjekjeve të dy palëve për krijimin e hapësirave për praktika dhe punësim, përsosjen e aftësive profesionale të studentëve dhe të diplomuarve të FIM. Pjesë e marrëveshjes janë gjithashtu angazhimi në hulumtime dhe projekte të përbashkëta shkencore, vendore dhe ndërkombëtare, si dhe mbështetja financiare për aktivitete dhe evente akademike në FIM.

Kompania "Munda Kosova", është një nga kompanitë liderë të Tregut Premium gjerman në industrinë automobilistike, merret me zhvillimin dhe prodhimin e tapicerive dhe tekstileve për industrinë e automobilave. Investimi i kompanisë "Munda" në Kosovë pritet të sjellë jo vetëm hapjen e shumë vendeve të reja të punës, por edhe përvoja të vlefshme në fushën e tekstileve teknike, duke sjellë njohuri të avancuara për teknologjinë e ndriçimit të bazuar në LED. Ky investim pritet të krijojë mundësi inovative në këtë fushë.