Të dashur maturantë dhe studentë,
Universiteti i Prishtinës ka hapur konkurs plotësues për nivelet e studimeve bachelor e master në vitin akademik 2025/’26.
Me këtë konkurs UP-ja synon të pranojë 745 studentë të rregullt në nivelin bachelor. 12 për qind e këtyre studentëve do të jenë nga komunitetet joshumicë, 2 për qind nga Shqipëria, Maqedonia dhe Presheva, Bujanovci e Medvegja dhe 1 për qind nga Mali i Zi. Në nivelin master do të pranohen 587 studentë të tjerë.
Aplikimi për konkursin plotësues në nivelin bachelor mund të bëhet në platformën http://apliko.uni-pr.edu. Konkursi është i hapur nga 30 shtatori deri më 2 tetor 2025, në orën 16:00. Edhe për nivelin master, kandidimi bëhet në të njëjtën platformë, por konkursi për këtë nivel studimi zgjat nga 30 shtatori deri më 7 tetor 2025, në orën 14:00.
Detajet e konkurseve bachelor e master dhe fakultetet ku ka ende mundësi pranimi e vende të lira, mund t’i gjeni në vegëzat në vijim:
Konkursi i nivelit bachelor
Konkursi i nivelit master
Programet e studimit të ofruara nga UP-ja mbulojnë fusha të ndryshme studimi dhe janë të ndërtuara për të përgatitur studentët për sfidat e tregut të punës, duke i pajisur ata me njohuri dhe aftësi të nevojshme për zhvillim profesional dhe personal.
Universiteti i Prishtinës synon të krijojë një ambient të favorshëm akademik, ku studentët mund të rriten në aspektin intelektual dhe të arrijnë objektivat e tyre në karrierë.
Ky universitet është më i vjetri, më i madhi dhe më i suksesshmi institucion i arsimit të lartë në Kosovë dhe i rendituri më së larti në platformat e njohura ndërkombëtare nga të gjitha universitetet e hapësirave ku jetojnë shqiptarët në Ballkanin Perëndimor dhe në botë.