Në fakultetin e Inxhinierisë Mekanike të Universitetit të Prishtinës, me datë 24 Janar 2025, në një mbledhje të përbashkët, u nënshkrua marrëveshja e bashkëpunimit me Fakultetin e Inxhinierisë Mekanike të Universitetit Politeknik të Tiranës.
Marrëveshja ndërinstitucionale e cila mblodhi në një tryezë të dy këshillat e fakulteteve, synon fuqizimin e përbashkët akademik e sistemor, duke u mbështetur në:
-Caktimin e objektivave drejt përsosjes dhe unifikimit të planeve dhe programeve mësimore për nivelet Bachelor dhe Master si dhe mbështetjes me planet dhe programet mësimore për nivelin e Doktoratës;
-Hartimin dhe zbatimin të projekteve të përbashkëta kombëtare dhe ndërkombëtare;
-Shkëmbime të studentëve dhe stafit akademik/administrativ;
-Organizimin e aktiviteteve të përbashkëta, debate, kongrese, simpoziume, workshop-e në fushën e inxhinierisë mekanike dhe zhvillimit teknologjik;
-Pjesëmarrjen në projekte kombëtare dhe ndërkombëtare si Erasmus+, Horizon etj;
-Përdorimin e literaturës shkencore dhe platformave online.
Nga FIM-UP marrëveshja u nënshkrua nga Dekani, Prof. dr. Mirlind Bruçi dhe nga FIM-UPT u nënshkrua nga Prof.dr. Genti Guxho.
Ky nënshkrim i marrëveshjes pasoi me diskutimet e partnerëve kryesorë lidhur me bashkëpunimin drejt organizimit të Kongresit të synuar Ndërkombëtar të Inxhinierisë Mekanike -ICME 2025, ngjarje kjo e cila pritet të mbahet në gjysmën e dytë të vitit 2025.
Pikat kryesore të diskutimit ishin:
- Qëllimi dhe vizioni i kongresit si ngjarje e rëndësishme e cila do të mbledhë në një vend akademikët, studiuesit dhe profesionistët ndërkombëtarë, për të prezantuar dhe shkëmbyer të arriturat shkencore në inxhinieri mekanike.
- Përcaktimi i tematikave kryesore dhe strukturimi i tematikave në sesione të ndryshme,
- Krijimi i strukturës organizative të kongresit, në kuadër të së cilës u themeluan trupat përgjegjës, si: presidenti me zëvendës presidentët, komiteti shkencor, komiteti organizativ, komiteti këshillues, komiteti për diversitet, etj.
- Prezantimi i platformës elektronike me afatet kohore të bashkëngjitjes së artikujve shkencor, politikave të publikimit, ndërkombëtarizimi, të drejtave të autorësisë etj.
Përfundimisht, palët u zotuan për një koordinim ndërinstitucional për të monitoruar progresin dhe detajet që do të dalin gjatë organizimit të kongresit.
